Ўзбекистон ва Украина савдо айланмасини йилига 1 млрд долларга етказишга қарор қилди(фото)

Ўзбекистон ва Украина ўзаро савдони янада кенгайтириш ва диверсификация қилиш ҳамда яқин келажакда унинг ҳажмини йилига 1 млрд долларгача ўсишини таъминлаш учун биргаликдаги саъй-ҳаракатларни фаоллаштириш ниятида.

Бу ҳақда 3 ноябрь куни бош вазир ўринбосари — инвестициялар ва ташқи савдо вазири Сардор Умурзоқов Украинанинг Ўзбекистондаги элчиси Николай Дорошенко билан учрашувда айтди, деб хабар бермоқда вазирлик матбуот хизмати.

Томонлар ўзаро савдони янада кенгайтириш ва диверсификация қилиш ҳамда яқин келажакда унинг ҳажмини йилига 1 млрд долларгача ўсишини таъминлаш учун биргаликдаги саъй-ҳаракатларни фаоллаштириш зарурлигини таъкидладилар.

Томонлар мамлакатлар ўртасидаги муҳим истиқболни кимё, нефть-кимё, металлургия, озиқ-овқат, фармацевтика, саноат кооперацияси соҳасида ва ахборот-коммуникация технологиялари секторида кўрмоқда. Шунингдек, машинасозлик ҳамда нефть ва газ ускуналарини ишлаб чиқариш соҳасида саноат кооперациясини йўлга қўйиш ташаббуси ҳам кўриб чиқилган.

Ўзбекистон ва Украина талабга эга қишлоқ хўжалик экинларини етиштириш ва қайта ишлаш бўйича қўшма агросаноат корхоналарини ташкил этиш орқали қишлоқ хўжалиги соҳасида кооперация қилишга алоҳида эътибор қаратди.

Учрашув якунида инвестициявий, саноат ва савдо-иқтисодий ҳамкорликнинг мавжуд салоҳиятини ўрганиш ва уни кенгайтириш бўйича аниқ таклифларни тайёрлаш мақсадида икки мамлакат тегишли вазирлик ва идоралари раҳбарларидан иборат қўшма ишчи гуруҳини тузиш тўғрисида келишувга эришилган.