Бугун, 7 ноябрь куни “Минораи Калон” меҳмонхонасида “Visit Uzbekistan” журналининг Бухоро ҳақидаги махсус сони тақдимоти бўлиб ўтди. Бу ҳақда Бухоро вилояти ҳокимлиги матбуот хизмати хабар берди.
Тақдимот Dinara & Cо нашриёти ташаббуси билан ўтказилди. Унда халқаро ташкилотлар, меҳмонхона соҳаси вакиллари, экспертлар ва бизнес олами эгалари иштирок этди.
Мазкур журнал тақдимоти шу кунгача Сингапур, Лондон, Деҳли каби дунёнинг саккиз мамлакатида ташкил этилган. 2020 йилда журналнинг мамлакатимиз ҳудудлари ҳақида махсус сонлари яратилди. Ноябрь ойида ношир, америкалик ёзувчи Меган Ивс таҳририят муҳаррири ва халқаро ривожланиш бўйича маслаҳатчиси сифатида журналга ишга таклиф қилинди. Бухорога бағишланган сон ҳам айнан Меган иштирокида чоп этилди.
Маълумот учун, Меган Ивс бунгача “Lonely Planet” журналида муҳаррир бўлиб ишлаган. Шунингдек, унинг CNN, BBC учун яратган дастурлари “Independent Culture Trip” да намойиш этилади. Катта тажрибага эга саёҳ-ёзувчи сифатида у 60 та китоб чоп этилишида ўз ҳиссасини қўшган ва жаҳон миқёсидаги сайёҳлик ва туризм мутахассиси сифатида эътироф этилади.
