Кеча, 21 январь куни Ўзбекистон Республикаси Президенти Шавкат Мирзиёев Бухоро вилоятига ташрифини Олот, Қоракўл, Шофиркон ва Жондор туманлари маҳалла раислари ва фаоллари билан учрашувдан бошлади. "Даракчи" мухбири Сардорбек Раҳмонқуловнинг хабар беришича, учрашувда маҳаллабай иш юритиш орқали мазкур туманлар аҳолисининг турмуш шароитини яхшилаш масалалари муҳокама қилинган.
"Менга ҳаммаси яхши, президент, дейдиган гаплар керак эмас, агар аҳвол яхши бўлганда, мен Бухорога келмасдим"- деди президент.
Айни пайтда 300 мингдан ортиқ ишсизлик кузатилаётган Бухоро вилоятининг саноат ривожидан орқада қолаётган Олот, Қоракўл, Шофиркон ва Жондор туманларида ихтисослашган тадбиркорик, ўрта ва йирик саноат ишлаб чиқаришини ташкил этиш бўйича мутасаддиларнинг таклифлари ҳам тингланди.
"Қарсакда ҳақиқат йўқ, мулоқотда ҳақиқат", - дея Шавкат Мирзиёев кўпроқ мулоқотга урғу бериб ўтди.
Шунингдек, туманлар сектор раҳбарлари ва уларга бириктирилган ўринбосарларнинг ўзлари масъул бўлган маҳаллаларда уйма-уй юриб, ҳар бир фуқаронинг дардини тинглаш лозимлиги таъкидланди.
"Кабинет йўқ! Ҳокимлик биноси ёпилади. Улар маҳаллаларга бориб ётиб ишлашади",- деди президент.
Сардорбек Раҳмонқулов
