Машҳур турк киноижодкорларининг Тошкент халқаро кинофестивалига ташриф буюриши кутилмоқда.
Улар «Кара севда» ("Севги изтироби") ҳамда «Муҳташам юз йил» сериалларида ўзига хос образларда намоён бўлган актрисалар Мелиса Памук ва Филиз Аҳмет, шунингдек, Туркиядан яна Озджан Дениз, Селим Байрактар, Сефа Зенгин, Эрджан Кесал, Эркан Колчак Кёстендиль ва бошқа киноижодкорларнинг ташрифи кутилмоқда.
Бундан ташқари, туркиялик киноижодкорлар қатори эстрада хонандаси Сердар Ортач ҳам Тошкент халқаро кинофестивалида иштирок этиш истагини билдирган.
Кинематография агентлиги Ахборот хизматининг хабар қилишича, туркиялик меҳмонлар кинофестиваль олди ташкилотчиларга видеомурожаат йўллаб, Тошкент халқаро кинофестивалида иштирок этишларини маълум қилишган.
Тошкент халқаро кинофестивали таниқли киноюлдузларига мезбонлик қилиш билан бирга, фестиваль доирасида 15га яқин давлатнинг кино кунлари ҳам ўтказилади.
Эслатиб ўтамиз, Тошкент халқаро кинофестивали 28 сентябрь — 3 октябрь кунлари бўлиб ўтади.
