Қозоғистонда норозилик намойишлари ҳамон давом этмоқда. Вазият жиддий тус олмоқда. Шу муносабат билан кеча, тунда Қозоғистон Республикаси Президенти Тўқаев раислигида Хавфсизлик кенгашининг илк йиғилиши бўлиб ўтди. Унда мамлакатдаги вазият таҳлил қилинди.
Шундан сўнг, Коллектив хавфсизлик шартномаси ташкилоти мамлакатга чекланган муддатга тинчликпарвар кучларни киритишини эълон қилди.
Бу ҳақда КХШТнинг 2022 йилда раиси бўлган Арманистон бош вазири Никол Пашинян Facebook'даги саҳифасида маълум қилди.
"Қозоғистон Президентининг мурожаати муносабати билан ва Қозоғистон Республикасининг миллий хавфсизлиги ва суверенитетига, жумладан, ташқи аралашув туфайли юзага келган таҳдидни ҳисобга олиб, КХШТ кенгашига, коллектив хавфсизлик шартномасининг 4-моддасига мувофиқ, ушбу мамлакатдаги вазиятни барқарорлаштириш ва нормаллаштириш мақсадида мамлакатга тинчликпарвар кучларини чекланган муддатга юборишга қарор қилинди”, — деб ёзади Пашинян.
