Прагадан 50 км узоқликдаги автомагистралда бир нечта автомобиллар иштирокида йирик ЙТҲ содир бўлди.
Ҳодиса Жебрак шаҳри яқинида, Прага йўналишида содир бўлган. ЙТҲда 36 та енгил ва юк машинаси иштирок этган. Тўқнашган машиналар катта йўлнинг 150 метрлик қисмига сочилиб кетган. Олти киши жароҳатланган, улардан икки нафари машина ичида қолиб кетган.
"Биз енгил жароҳатлар билан уч кишини Хоровитсадаги жарроҳлик бўлимига олиб бордик, ўртача оғирликдаги икки киши ҳаво орқали Прагага жўнатилади, чунки магистраль ҳозир ёпиқ", -деди Марказий Богемия тез тиббий ёрдам маркази матбуот котиби Петра Гомолова.
Қайд этилишича, бир нафар жабрланувчига жойида тиббий ёрдам кўрсатилган.
Эслатиб ўтамиз, бу Чехиядаги сўнгги вақтлардаги биринчи йирик бахтсиз ҳодиса эмас. Октябрь ойи охирида тез ёрдам машинаси ва йўловчи автобусининг тўқнашуви натижасида бир киши ҳалок бўлди, яна бир неча киши жароҳатланди.
