Солиқ тўловчилардан келиб тушаётган мурожаатларни инобатга олган ҳолда, «Солиқчи-кўмакчи» тамойили асосида, 21 ноябрдан бошлаб 20 кун давомида 2022 йил 1 январдан (1 январь ҳам киради) хато чоп этилган онлайн-НКТ чекларини таҳрирлашга имконият берилди.
Давлат солиқ қўмитаси матбуот хизмати хабарига кўра, бунинг учун солиқ тўловчининг my.soliq.uz сайтидаги шахсий кабинетида “YUSh onlayn-NKM ва виртуал касса маълумотлари” саҳифасидан "Таҳрирлаш" бўлимига кирилади. Қидирув тизимига чекнинг фискал модул ID ва рақамини киритиб тузатиладиган чек топилади. Очилган ойнада чек маълумотлари таҳрирланади.
Хусусан, чек маълумотларини таҳрирлашда қуйидагиларни ўзгартириш мумкин:
▫️ МХИК;
▫️ миқдори;
▫️ ўлчов бирлиги;
▫️чек суммаси;
▫️ комитент СТИРи;
▫️ тўлов тури (нақд пул ёки банк карта).
Барча ўзгартиришлар киритилгандан сўнг, фақат битта файл – тадбиркорлик субъектининг ҳолат юзасидан батафсил тушунтириши баён этилган расмий хати (муҳрланган фирма бланкида) илова қилиниши лозим.
Тузатиш киритиш учун юборилган чеклар ҳудудий давлат солиқ бошқармасида тузилган ишчи гуруҳи билан келишилган ҳолда тезкорлик билан ўрганилади. Кўриб чиқиш натижаси ижобий деб баҳоланса, чек ҳолати "қабул қилинган"га ўзгаради.
Рад этилган тақдирда солиқ органининг изоҳига кўра, тузатишлар киритилиб қайта юборилиши лозим.
Якунда, "Ҳисоблаш" ва "Жўнатиш" тугмаси босилади.
Истисно: истеъмолчиларга харид суммасидан 1 % қайтарилган (кешбек) чеклар таҳрирланмайди.
