“UzAuto Motors” АЖнинг кредит рейтинги Б+ (Барқарор кутилма)дан ББ- (Барқарор кутилма)га кўтарилди ва Ўзбекистон Республикасининг суверен кредит рейтингига тенглаштирилди. Бу ҳақда компания матбуот хизмати хабар қилди.
Маълум қилинишича, ушбу натижа “Фитч Ратинг” халқаро рейтинг агентлигининг жорий йилнинг 13 декабрдаги кредит рейтинги бўйича навбатдаги ҳисоботида эълон қилинди.
“Fitch Rating” агентлиги “UzAuto Motors”нинг кредит рейтингини компаниянинг мамлакат иқтисодиёти учун аҳамияти ортиб бораётгани, автомобиллар ишлаб чиқариш ва сотишнинг ўсиш суръатлари, моделлар қаторининг янгиланиши, шунингдек, молиявий натижаларнинг изчил яхшиланиб бораётгани муносабати билан оширди.
Агентлик маълумотларига кўра, Ўзбекистонда автомобиль импортига божхона тўловлари камайтирилгани ва рақобатнинг кучайганига қарамай, "UzAuto Motors" бозордаги устунлигини сақлаб қолмоқда. Шунингдек, Агентлик UzAuto Motors компанияси томонидан ишлаб чиқарилган автомобиллар энг мақбул нархларда етказиб берилаётганлиги сабабли, хорижий брендлар учун "UzAuto Motors" маҳсулотларини алмаштириш қийин бўлишини таъкидлади.
Агентлик UzAuto Motors Лондон фонд биржасида еврооблигацияларини жойлаштирган кам сонли компаниялардан бири эканлигини ҳисобга олади, бу эса компаниянинг хорижий капитални жалб қилиш имкониятини тасдиқлайди.
Шунингдек, компания даромад ҳажми бўйича иқтисодиёт тармоқларининг тоғ-кон ва нефть-газ соҳаларидаги энг йирик компаниялар даражасида эканлиги қайд этилди.
Маълумот учун: 2021 йил 23 март куни “Fitch Rating” халқаро рейтинг агентлиги UzAuto Motors АЖга Ўзбекистон Республикасининг суверен кредит рейтингидан бир поғона паст бўлган "Б+" (Барқарор прогноз) кредит рейтингини берган.
