Тиббий маслаҳат: Қишда нега юқумли касалликлар авж олади?

САЛОМАТЛИК 17.01.2023, 22:09
Тиббий маслаҳат: Қишда нега юқумли касалликлар авж олади?

Мутахассислар қишда мавсумий касалликлар авж олишини иммунитет заифлашуви билан изоҳлайди. Хўш, совуқ ҳароратда организмнинг инфекцияларга қарши курашиш қобилияти нега пасаяди?

Республика эпидемиология, микробиология, юқумли ва паразитар касалликлар илмий-амалий тиббиёт маркази директори Ботир Тожиев ушбу саволга жавоб берди.

 — Вируслар совуқ ва қуруқ ҳавода фаоллашади. Тўғри, қиш фасли атмосферада намлик нисбатан юқори бўлади. Бироқ хоналар иситилиши сабабли ҳаво қуруқлашади. Бу эса инфекцияларнинг авж олиши учун қулай муҳит.  

Қолаверса, патогенлар тоза ҳавони ёқтирмайди. Аммо совуқ кунларда эшик ва деразалар зич ёпилиб, хоналар ҳавоси тез-тез алмаштирилмайди. Одамлар асосий вақтини иссиқ шароитда, бир неча киши ёки кўпчилик бир жойда жамланиб ўтказади. Вируслар эса ёпиқ бино-иншоотлар, аҳоли гавжум жойларда тезроқ тарқалади.

Д витамини — иммунитет тизимининг меъёрий ишлаши учун муҳим элемент. Танамиз бу моддани мустақил ишлаб чиқара олади. Фақат бунинг учун ультрабинафша нури зарур. Қиш фаслида қуёшли кунлар кам бўлиши боис организмнинг бу дармондорига эҳтиёжи ортади.

Совуқ ҳарорат юқори нафас йўлларидаги туғма иммунитет ҳужайралари фаолиятига салбий таъсир кўрсатади. Ўз навбатида, қуруқ ҳаво инфекциялар учун тўсиқ бўлган шиллиқ қаватлар хусусиятларини ўзгартиради. 

Янги узилган сархил мева-сабзавотлар — витаминларнинг табиий манбаи. Қишда бундай маҳсулотларни топиб истеъмол қилиш қийин. Бу ҳам иммунетимизни заифлаштирувчи яна бир омил. 

Камҳаракатлик ҳам организмнинг касалликларга курашиш қобилиятини сусайтиради. Оқибатда шамоллаш ва гриппга чалиниш эҳтимоли ошади. Қиш мавсумида кўпчилик асосий вақтини ёпиқ муҳитда ўтказиши туфайли жисмоний фаолликдан чекланади.

Шарҳлар

Об-ҳаво: Тошкент
Валюта курси
1