Коррупсияга қарши курашиш агентлиги томонидан 2023 йил феврал ойидаги давлат харидларига оид жами 25 млрд сўмлик қонунбузилиш ҳолатлари юзасидан буюртмачиларга 26 та тақдимнома киритилган, шунингдек, аниқланган ҳолатларга ҳуқуқий баҳо бериш учун тўпланган ҳужжатлар ҳуқуқни муҳофаза қилувчи органларга юборилган.
Жумладан, қуйидаги қонунбузилиш ҳолатлари аниқланди:
“Uzbekistan Airports” АЖ буюртмачилигида 4,3 млрд сўмга жиҳозлар харид қилиш бўйича ўтказилган давлат харидида иштирокчиларга рақобатни чекловчи шартлар киритилган;
“Ҳудудий электр тармоқлари” АЖ Хоразм ҳудудий филиали буюртмачилигидаги 2,6 млрд сўмга “Темир-бетон устун” харид қилиш бўйича ўтказилган давлат харидида “Давлат харидлари тўғрисида”ги Қонун талаблари бузилган;
Тошкент вилояти кўп тармоқли тиббиёт маркази буюртмачилигидаги 796 млн сўмга тиббий асбоб ускуналар сотиб олиш бўйича ўтказилган давлат харидида аффилланганлик ҳолатларига баҳо берилмаган.
Агентлик томонидан киритилган тақдимнома ва сўровномалар натижасида 12 та давлат хариди бекор қилинган ҳамда 7 та маъмурий иш қўзғатилган.
