Шарқий Ҳиндистондаги Ғарбий Бенгалия штатида эр-хотин фарзандини iPhone 14 сотиб олиш учун сотиб юборди, деб ёзди Times of India.
Маълум қилинишича, эр-хотин Инстаграм видеоларини яратиш учун энг янги гаджетни сотиб олиш учун ўз фарзандларини сотишган.
Қўшнилар Гош оиласининг хатти-ҳаракатларида ғалати ўзгаришларни пайқагач, воқеа маълум бўлади. Уларнинг саккиз ойлик чақалоғи шунчаки ғойиб бўлади, аммо ота-оналар ҳеч қандай қайғу белгиларини кўрсатмайди. Қолаверса, эр-хотин ўтмишда молиявий қийинчиликларга дуч келганини инобатга олиб, нархи камида миллион бўлган қимматбаҳо телефоннинг харид қилиниши ҳам қўшниларда шубҳа уйғотди.
Шундан сўнг, аёл ва унинг эри ҳақиқатан ҳам iPhone сотиб олиш учун фарзандини сотганини тан олди, бу уларга Бенгалиянинг турли қисмларида саёҳат видеоларини яратиш ва уларни Инстаграмда жойлаштириш имконини берган.
Маълум бўлишича, ота саккиз ойлик чақалоқни сотишдан олдин, етти ёшли қизини ҳам сотишга уринган.
Маҳаллий полиция Сати исмли онани ҳибсга олишга муваффақ бўлди, бироқ оиланинг отаси Гош қочишга муваффақ бўлди. У ҳали ҳам қидирилмоқда. Полиция эр-хотинга нисбатан жиноий иш очган, болани сотиб олган аёл ҳам одам савдоси учун жиноий жавобгарликка тортилган.
Қайд этилишича, бу воқеа биринчи ҳодиса эмас. Ҳиндистонда ота-оналар ўз фарзандларини моддий манфаат кўзлаб сотишга йўл қўйган бир неча ҳолатлар бўлган. Бундан ташқари, 2016 йилда хитойлик эр-хотин ҳам iPhone сотиб олиш учун 18 кунлик қизини 3530 долларга сотган.
Шу йилнинг март ойида австралиялик аёл судда туғилмаган фарзандини iPhoneга алмаштирмоқчи эканлигини маълум қилган эди. Кейинчалик у икки қизини тўққиз соат давомида машинага қамаб қўйган ва бу уларнинг ўлимига олиб келган.
