Тошкент шаҳрида 12 яшар қизга пенсиядаги мусиқа ўқитувчиси икки йил давомида тегажоғлик қилиб келгани айтилмоқда. Бу ҳақда Nemolchi.uz лойиҳаси хабар берди.
Қайд этилишича, пенсиядаги мусиқа ўқитувчиси, 1957 йилда туғилган С А, қизига дарс бериш асносида икки йил давомида унга тегажоғлик қилиб келган, охиргисида эса номусига тегишига сал қолган. У қиз оиласининг тўлиқ ишончига кириб, ҳатто уларнинг уйига ҳам бориб турган. Аввал қиз машғулотларга ўз ота-онаси билан қатнаган. Лекин жорий йилнинг март ойидан бошлаб бир ўзи қатнай бошлаган. Қиз оиласи унга тўлиқ ишонган, эркак эса бундан фойдаланган.
“Биринчи марта қизим бир ўзи келганида у қизимизга дарс беришдан бош тортишини ва у ҳаётда ўрнини топа олмаслигини айтди. Мусиқа унинг орзуси эканлигини билиб туриб, уни қадрсизлантириб, қиз уларнинг “ўзгача” муносабатларини қабул қилишини уқтириб келади. Ота-онасига айтадиган бўлса, у қизнинг яхши шуғулланмаётганини айтиш билан қўрқитади” , дейилади хабарда.
Жабрланувчи онасининг сўзларига кўра, эркак давомий равишда қизга нисбатан уятсиз қилиқлар қиллиб келган. Қизнинг телефонидан порнографик характердаги сайт ва комиксларни очиб, жинсий яқинлик таклиф қилган. Қизча шокка тушган ва ундан бундай қилмасликни сўраган. Ҳатто ўз жонига қасд қилишни ҳам ўйлаган экан.
19 май куни қизча навбатдаги машғулотга келган. Ўқитувчи маст ҳолатда бўлган ва киришиданоқ қизчага тегажоғлик қилиб, номусига тегмоқчи бўлган. Қизча қочишга улгурган. Уйга келгач, ота-онаси ундаги ўзгаришларни пайқаб, нима бўлганини сўраган ва қизчадан суриштириб, бор ҳақиқатни билиб олган.
“Икки йил давомида режаларини тузиб, қизимизга илк дарсданоқ уларда ўзгача муносабат бўлишини билганини айтади. Биз нима қилишимиз керак? Кимдан ҳимоя излайлик?” , деган қизнинг ота-онаси.
Берилган маслаҳатларга кўра, қиз онаси ҳуқуқ-тартибот идораларига мурожаат қилиб, Тошкент шаҳар прокуратурасига ҳам ариза ёзади. Улар тегишли текширувлардан ўтган, психологлардан бир қанча хулосалар ва тавсиялар олишган, терговчи уларни сўроқ қилган (бунда психолог/ўқитувчи бўлмагани учун Жиноят-процессуал кодекс талаблари бузилди). Суд-тиббий экспертиза қизнинг қўллари ва оёғида “кўп қонталашлар” борлигини тасдиқлаган.
Маълум қилинишича, айни вақтда айбланувчи гаров эвазига озодликда қолмоқда, иш эса Жиноят кодексининг 129-моддаси 2-қисми билан квалификация қилиниши режалаштирилмоқда.
