Тошкент вилоятининг Оҳангарон туманида қурилиш объекти билан боғлиқ ҳолатда 83,5 минг АҚШ доллари талаб қилган МЧЖ раҳбари ушланди. Бу ҳақда Давлат хавфсизлик хизмати хабар берди.
Маълум қилинишича, туманда фаолияти йўлга қўйилаётган паррандачилик фабрикаси қурилишида бош пудратчи ҳисобланган МЧЖ раҳбари объект ички йўлларини асфальтлаш ишларини бажариш учун бошқа бир МЧЖни ёрдамчи пудратчи сифатида жалб қилган.
Томонлар жорий йил апрель ойида мазкур ишлар бўйича 3,7 млрд сўмлик келишув шартномасини тузган. Шартнома доирасидаги ишлар бажарилган ва бош пудратчи томонидан ёрдамчи пудратчининг ҳисоб рақамига 2,5 млрд сўм ўтказилган. Бироқ қолган 1,2 млрд сўм тўлаб берилмаган.
Таъкидланишича, МЧЖ раҳбари асфальтлаш объектини ёрдамчи пудратчига бириктириб бергани ва қолган 1,2 млрд сўмни ҳам тўлаб бериш эвазига унинг таъсисчисидан жами 83,5 минг АҚШ доллари талаб қилган.
Давлат хавфсизлик хизмати Тошкент вилояти бўйича бошқармаси ҳамда Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбир давомида МЧЖ раҳбари талаб қилинган пулни олаётган вақтида ашёвий далиллар билан ушланган.
