Бироз аввал Марокашда 6,9 балли кучли зилзила содир бўлгани ҳақида хабар берган эдик.
Марокашнинг марказида содир бўлган зилзила оқибатида ҳалок бўлганлар сони 632 кишига етди, 329 киши эса жароҳатланган. Бу ҳақда Al-Arabiya нашрио маълум қилмоқда.
9 сентябрга ўтар кечаси Марракеш шаҳридан 80 километр узоқликдаги тоғли ҳудудда 7,2 магнитудали зилзила содир бўлди, деб хабар берди Марокаш Миллий геофизика институти. АҚШ Геология хизмати эса зилзила магнитудаси 6,8 га баҳолангани ва ер силкинишлари нисбатан саёз — 18,5 километр чуқурликда содир бўлганини маълум қилди. Ички ишлар вазирлиги маълумотларига кўра, зилзила Ал-Ҳауз, Уарзазат, Марракеш, Азилал, Шихауа ва Тарудант провинсияларида ҳам сезилган.
Зилзила эпимарказига энг яқин жойлашган йирик шаҳар Марракешда турар жой бинолари ва бошқа иншоотлар қулаб тушди. Аҳолининг хабар беришича, ЮНЕСКО'нинг Бутунжаҳон мероси рўйхатига киритилган эски шаҳарда ҳам уйлар қулаган. Маҳаллий телевидение масжид вайрон бўлганини ва машиналар мажақланиб кетганини кўрсатди. Қутқарув хизматлари вайроналарни тозалашда давом этмоқда.
Зилзиладан жабр кўрган ҳудудларда мобил алоқа ва электр таъминотида муаммолар юзага келган.
Ҳиндистон ва Европа Иттифоқи расмийлари Марокашга ёрдам кўрсатишга тайёрлигини маълум қилди.
