Сурхондарё вилоятининг Денов туманида фуқарони Германияда юқори маошли ишга жойлаштиришни ваъда қилиб, 5 миллион 766 минг сўм маблағини ўзлаштирган шахс қўлга олинди. Бу ҳақда Кибержиноятларга қарши курашиш департаменти хабар берди.
Маълум қилинишича, фуқаро ижтимоий тармоқдаги “Humo viza” номли сохта аккаунтга ишонган. Номаълум шахс унга Германияда юқори маошли иш таклиф қилишни ваъда қилиб, турли баҳоналар билан банк картаси орқали 5 миллион 766 минг сўмни қўлга киритган.
Фуқаронинг 112 қисқа рақамига қилган мурожаатидан сўнг Сурхондарё вилояти ИИБ Кибержиноятларга қарши курашиш бошқармаси ходимлари тезкор тадбир ўтказган. Натижада фирибгарликда гумонланаётган шахс аниқланиб, қўлга олинган.
