АҚШнинг Флорида штати губернатори Рон ДеСантис 50 йил аввал содир этилган қотиллик учун ўлим жазосига ҳукм қилинган 74 ёшли Уильям Томпсоннинг қатл этилишига оид ордерни бекор қилди. Бу ҳақда “New York Post” нашри хабар берди.
Маълум қилинишича, Томпсонни қатл этиш 14 октябрь кунига белгиланган эди. Бироқ губернатор 9 октябрь куни, қатлга беш кун қолганида, тегишли ҳужжатни бекор қилди. Ушбу қарорнинг сабаблари очиқланмаган.
Нашрнинг ёзишича, маҳбус деменция ва жиддий когнитив бузилишлардан азият чекмоқда. Унинг адвокати Бриттни Лейси соғлиғи кескин ёмонлашгани сабабли шошилинч тиббий ёрдам кўрсатишни сўраган.
Нейропсихолог Роберт Оуаунинг хулосасига кўра, Томпсон яқинлашиб келаётган қатлнинг моҳияти ва сабабларини тушуниш учун зарур бўлган ақлий қобилиятини йўқотган.
Томпсон 1976 йилда Салли Ивестер исмли аёлнинг ўлдирилишида шериги Рокко Сураче билан бирга айбдор деб топилган. Тергов маълумотларига кўра, улар аёлдан 200 доллар талаб қилган, аммо у фақат 25 доллар бера олган. Шундан сўнг, эркаклар аёлни занжирлар билан урган, сигарет билан куйдирган ва қийноққа солган. Кейин ундан онасига қўнғироқ қилиб, қўшимча пул сўрашни талаб қилган. Ивестер тан жароҳатлари ва ички аъзоларига етказилган шикастлар оқибатида вафот этган.
Томпсон дастлаб 1976 йилда ўлим жазосига ҳукм қилинган. Бироқ бу ҳукм кейинчалик бекор қилинган. У 1982 ва 1987 йилларда қатл этилишдан сақланиб қолган бўлса, 1989 йилда яна ўлим жазосига ҳукм қилинган. Шундан буён у қатлни кутаётган маҳбуслар қаторида бўлган.
Маълумот учун, АҚШ Конституциясининг Саккизинчи тузатиши шафқатсиз ва ғайриоддий жазоларни тақиқлайди. Ўзининг қатл этилиши сабаби ва моҳиятини руҳий ҳолати туфайли англай олмайдиган маҳбусларни қатл қилиш ҳам мазкур конституциявий чекловлар билан боғлиқ ҳуқуқий масалаларни келтириб чиқаради.
