“Ипак йўли дурдонаси” Тошкент халқаро кинофестивали доирасида арманистонлик таниқли кино актёри СССР Халқ артисти Фрунзик Мкртчяннинг (1930-1993) ҳаёти ва фаолиятига бағишланган “Ўзбекистон мени эслайди” ҳужжатли фильми лойиҳаси намойиш этилди.
Мазкур фильм грузиялик продюсер ва кинорежиссёр Давид Беджиташвили лойиҳа ҳақида сўзлаб берди. Маълумки, Фрунзик Мкртчян ўзбек ва ҳинд киноусталари томонидан суратга олинган “Али Бобо ва қирқ қароқчи” (1979) ҳамда “Севги афсонаси” (1984) фильмларида суратга тушган. Мазкур фильмларни яратиш жараёнида Мкртчян Ўзбекистонда яшаган, ўзбек киноижодкорлари билан мулоқотда бўлган.
2021 йилда Давид Беджитшвили худди шу мавзуда “Ҳиндистон мени эслайди” номли фильмни суратга олган, унда Ф.Мкртчян иштирокидаги ҳинд фильмларнинг суратга олиш жараёнлари хусусида сўз борган. Навбатдаги фильм унинг давоми сифатида суратга олинади ва унда асосан Ўзбекистонда кечган воқеалар эсланади.
Тадбирда сўзга чиққан таниқли ўзбек санъаткорлари машҳур актёр билан юз берган қизиқарли воқеалар ҳақида сўзлаб беришди. Режиссёр йиғилганларни қизиқтирган саволларга жавоб қайтарди.
Айни пайтда фильмни суратга олишга тайёргарлик жараёни бошланган, 2024 йилда мазкур фильм экран юзини кўриши кутилмоқда.
