Ўзбекистон футбол ассоциацияси Тартиб-интизом қўмитасининг навбатдаги йиғилиши бўлиб ўтди. Унда сўнгги турлар доирасида бўлиб ўтган учрашувлардаги интизомий ишлар кўриб чиқилди.
Суперлиганинг 22-тури доирасидаги “Сўғдиёна” — “Андижон” учрашувида “Андижон” футбол клуби футболчиси Ф. Соҳибжонов тўп учун курашиш вақтида оёғининг таг қисми билан рақиб ўйинчисининг тўпиғига зарба бергани учун майдондан четлаштирилган.
Тартиб-интизом қўмитасининг қарорига кўра, Фарходжон Соҳибжоновга (Андижон) нисбатан 3 та ўйинга четлаштириш интизом чораси қўлланилди.
Ушбу тур доирасидаги учрашув якунлангандан сўнг, “Сўғдиёна” клуби футболчиси Э. Орифов бош ҳакам шаънига хақоратли сўзлар ишлатгани учун унга нисбатан 3 та ўйинга четлаштириш ва жарима интизом чораси қўлланилди.
Шунингдек, “Олимпик” — “Бунёдкор” учрашувида “Бунёдкор” футболчиси С. Иззатов ўйин вақтида оёғининг таг қисми билан рақиб ўйинчисини тўпиқ қисмини қасддан босиб олгани учун унга нисбатан 3 та ўйинга четлаштириш интизом чораси қўлланилди.
“Металлург” — “Бухоро” учрашувида “Металлург” футболчиси И. Шайқулов ўйин вақтида оёғининг таг қисми билан рақиб ўйинчисининг оёқ қисмига зарба бергани учун 2 та ўйинга четлаштириш интизом чораси қўлланилди.
“Металлург” — “Бухоро” учрашувида “Бухоро” футболчиси М. Жўрабоев оёғи билан рақибининг юз қисмига зарба бергани учун 2 та ўйинга четлаштириш интизом чораси қўлланилди.
Про лиганинг 20-тури доирасидаги “Ғиждувон” — “Хоразм” учрашувида “Ғиждувон” футболчиси Б. Жўрақулов мушти билан рақибини юзига зарба берган учун 3 та ўйинга четлаштириш интизом чораси қўлланилди.
Ушбу тур доирасидаги “Андижон СГС” — “Навбаҳор фарм” учрашувида “Андижон СГС” футболчиси Ф. Зухриддинов боши билан атайлаб рақибининг юзига зарба бергани учун 3 та ўйинга четлаштириш ва жарима интизом чораси қўлланилди.
