Украина президенти Владимир Зеленский ўз идорасига 2024 йил баҳорида бўлиб ўтадиган президентлик сайловларига тайёргарликни бошлашни буюрди. Бу ҳақда Олий Рада депутати Алексей Гончаренко маълум қилди.
"Мендаги маълумотларга кўра, Владимир Зеленский келаси йил президентлик сайловларини ўтказишга қарор қилган. У президент девонига 2024 йил 31 мартда ўтказилиши режалаштирилган сайловларга тайёргарлик кўришни топширган”, — деди депутат Эспрессо телеканалида.
Президент маъмурияти вакиллари ҳозирча бу маълумотга изоҳ бермаган.
Украинада парламент сайловлари шу йилнинг октябрь ойида бўлиб ўтиши керак эди, бироқ ҳарбий ҳолат туфайли у ўтказилмади.
Украина қонунчилиги ҳарбий ҳолат даврида президентлик сайловларини ўтказишни тақиқлайди. Зеленский президентлик сайловлари жанговар ҳаракатлар тугагандан кейингина ўтказилиши мумкинлигини бир неча бор таъкидлаган. Бироқ Киевнинг ғарбий ҳамкорлари уларни белгиланган муддатда амалга оширишни талаб қилмоқда. Зеленский интервьюларидан бирида у Ғарб молиялаштирса, сайловларни ҳарбий ҳолат остида ўтказиши мумкинлигини айтган.
