“Ўзбекистон темир йўллари” 2024 йилда юқори тезликда ҳаракатланувчи "Афросиёб" электропоезди чипталари нархини ошириш масаласини кўриб чиқмоқда. Бу ҳақда "Верона" Евроосиё иқтисодий форумида компания раисининг биринчи ўринбосари Ҳикматулла Раҳметов “Спот"га маълум қилган.
“Агар индексация бўлган тақдирда ҳам бу кейинги йилда бўлиши мумкин ва "Афросиёб" тезюрар поездлари учун бўлади. Биз бозорга, энергия нархига, Швейцария франкига боғланганмиз. Аслида мазкур индексацияга таъсир қилиши мумкин бўлган кўплаб омиллар мавжуд “, — деди у.
Раҳметовнинг қайд этишича, бутун дунё темир йўл компаниялари мутахассислар томонидан ишлаб чиқилган тариф сиёсатидан келиб чиқиб ҳар йили чипталар нархини индексация қилади.
Шунингдек, у 1 ноябрдан темир йўл чипталари нархи оширилганига изоҳ бериб, индексация “Ўзбекистон темир йўллари"нинг йўқотишларини камайтиришга ёрдам берганини таъкидлади.
“Ягона нарса шундаки, биз тарифни оширдик ва бу бугунги кунда бозорда кузатилаётган нархларнинг кичик индексациясини қоплаши мумкин. Бу — инфляция, энергия нархининг оширилиши, эҳтиёт қисмлари ва ҳоказо”, — дея изоҳлади Раҳметов.
Раис ўринбосари компаниянинг кўрилган зарари жуда юқори бўлгани ва ҳозир ҳам юқорилигича қолаётганини таъкидлаб, кичик ўзгариш туфайли бу йўқотиш нуқтаси бироз қисқариши мумкинлигини қайд этди.
Унинг сўзларига кўра, йўловчи ташишларида нафақат Ўзбекистонда, балки дунёнинг кўплаб давлатларида ҳам йўқотишлар кузатилади.
