Reuters агентлигининг маълум қилишича, Россия ёқилғи ишлаб чиқарувчиларига ҳукумат дизель ва бензин экспортига қўйилган қолган барча чекловларни бекор қилишга тайёрланишни буюрган.
Денгиз орқали дизель ёқилғиси экспорти бўйича дунёда биринчи ўринда турадиган Россия юқори ички нархлар ва тақчилликларни бартараф этиш учун 21 сентябрь куни ёқилғи экспортига тақиқ жорий қилганди.
Ҳукумат 6 октябрь куни чекловларни юмшатиб, дизелни қувур орқали экспорт қилишга рухсат берди, бироқ бензин экспорти бўйича чораларни сақлаб қолди. Чет элга юк машиналари ва темир йўллар орқали бензин етказиб бериш ҳам тақиқланган.
Энергетика вазири Николай Шулгинов чоршанба куни Россия бензиннинг айрим навларини экспорт қилиш тақиқини бекор қилиш масаласини кўриб чиқаётганини айтди.
"Улар ишлаб чиқарувчиларга экспорт келаси ҳафтадан бошлаб очилишини айтишди", деди Россия нефть компаниясидаги манба.
Яна бир саноат манбасининг айтишича, кейинги ҳафта тақиқ бекор қилинади.
"Улар келгуси ҳафтада экспортга қўйилган тақиқни олиб ташлашга ваъда беришди. Бу ваъда бўйича биз экспорт жадвали ва қайта ишлаш режасини туздик", - деган исми сир қолишини истамаган манба.
Дизель Россиянинг энг йирик нефть маҳсулоти экспорти бўлиб, ўтган йили тахминан 35 миллион тоннани ташкил этди. Унинг деярли тўртдан уч қисми қувур орқали ташилган. Россия 2022 йилда 4,8 миллион тонна бензин экспорт қилган.
Бошқа бир компания манбасининг айтишича, чекловлар туфайли бензин кўплиги пайдо бўлган.
“Ҳозир мавсум паст, ички бозорда бунчалик кўп сота олмаймиз”, деган манба.
