Чили собиқ президенти Себастян Пинера мамлакат жанубидаги Лос-Риос ҳудудидаги Ранко кўлига вертолёт қулаши оқибатида ҳалок бўлди, деб ёзади La Nacion вa BioBioChile.
BioBioChile маълумотларига кўра, Robinson R66 бортида тўрт киши бўлган: Пинеранинг ўзи ва унинг қариндошлари. Ҳалокатдан сўнг йўловчилар қирғоққа чиқишга муваффақ бўлишган, бироқ вертолётни бошқараётган собиқ президент хавфсизлик камарини еча олмай, чўкиб кетган. Қутқарувчилар унинг жасадини тахминан 40 метр чуқурликдан топдилар.
Воқеа сабаблари ҳозирча номаълум. BioBioChile маълумотларига кўра, вертолёт ҳавога кўтарилганидан бир неча дақиқа ўтиб ҳалокатга учраган. Айтишларича, бу вақтда ёмғир ёғган.
74 ёшли Себастян Пинера Чилини икки марта бошқарган. У 2010-2014 ва 2018-2022 йилларда президент лавозимида ишлаган.
