Қозоғистон Миллий музейи илмий кутубхонасида “Ўзбекистон маданий мероси жаҳон тўпламларида” туркумидаги 50 жилдни Қозоғистон Республикаси Миллий музейига Ўзбекистон Республикасининг элчихонаси билан биргаликда WОСCУ номидан топшириш маросими бўлиб ўтди.
Тадбир доирасида Ўзбекистоннинг Фавқулодда ва Мухтор Элчиси Саидикрам Ниёзхўжаев Қозоғистон Миллий музейи директори Айбек Сидиқовга “Ўзбекистон маданий мероси жаҳон тўпламларида” туркумининг 50 жилдлик тўпламини тақдим этди. Шунингдек, учрашув давомида 10 тилда нашр этилган 500 дан ортиқ илмий ишлар муаллифи, академик ва профессор Жакен Таимагамбетов маъруза билан иштирок этди.
Ўтган йили Қозоғистондаги музейлар, жумладан, Абилхон Қастеев номидаги Давлат санъат музейи коллекциясининг Ўзбекистон маданий меросига оид артефактлар ва экспонатларнинг бир қисми "Ўзбекистон маданий мероси Қозоғистон ва Қирғизистон музейларида" ҳамда "Абилхон Қастеев номидаги Қозоғистон Республикаси Давлат санъат музейи тўплами" нашрларида ўз аксини топди. Бундай ҳамкорликдаги лойиҳалар келгусида ҳам давом этиши кўзда тутилган.
