Нью-Йорк шаҳрида хотинига пичоқ ўқталиб, унга оғир тан жароҳати етказган ўзбекистонлик эркак полиция ходимлари томонидан отиб ташланган.
Ҳодиса 8 март байрами мунoсабати билан ташкил этилган тадбирда содир бўлган. Оилага яқин бўлган одамлар эркакда руҳий томондан муаммолар бўлганини айтишган.
Ҳодиса 2024 йил 8 март куни содир бўлган. Ню-Йоркнинг Квинс даҳасида уюштирилган 8 март байрами муносабати билан ташкил этилган тадбирда самарқандлик экани айтилаётган эр-хотин Жамшид Неъматов ва Амира Неъматова жанжаллашиб қолган.
Жанжал асносида эркак хотинига пичоқ билан зарба берган ва уни оғир жароҳатлаган.
Воқеа жойига етиб келган Ню-Йорк полицияси ходимлари жаҳл отига минган эркакдан қўлидаги пичоқни ташлашни талаб қилган. Оила бошлиғи талабга бўйсунмагач, полиция ходимлари унга ўқ узишга мажбур бўлган.
Оқибатда асли ўзбекистонлик бўлган Жамшед Неъматов ҳалок бўлган. Унинг тан жароҳати олган хотинига касалхонада оғир жарроҳлик амалиёти ўтказилган.
Маълум бўлишича, эр-хотин узоқ йиллардан буён бирга яшаб келган ва уларнинг 4 нафар фарзанди бўлган. Фарзандларидан тўнғич қизи 23, иккинчи қизи 20, ўғиллари 17 ва 14 ёшда экани айтилмоқда.
