Аввал хабар берганимиздек, бугун АҚШнинг Нью-Жерси штати Атлантик-Сити шаҳри навбатдаги UFC турнири ўтказилди. Унда ўзбекистонлик UFC жангчиси нурсултон Рўзибоев ҳам октагонга кўтарилиб, навбатдаги ғалабасини ҳисобига ёздириб қўйди.
Мусобақа ташкилотчилари бугунги оқшомда "бонуслар" кимларга насиб қилганини очиқлади. Туркиялик Ибо Аслан ҳамда швециялик Антон Туркал тўқнашуви бугунги турнирнинг энг яхши жанги деб топилди. Аслан жангнинг учинчи раундида рақибини техник нокаутга учратди. Ҳар иккала жангчи ҳам кафолатланган гонорарга қўшимча 50 000 долларлик бонус чекини ҳам қўлга киритишди.
Шунингдек, бугунги турнирда кўрсатган ёрқин жанглари учун америкаликлар Нэт Ландвер ва Деннис Бузукья ҳам 50 минг долларлик мукофот пулига лойиқ кўрилган. Нэт жангнинг биринчи раундида ҳамюрти Жамалл Эммерсни, Бузукья эса учинчи раундда Коннор Мэттьюсни нокаутга учратди.
Бироқ, бу сафар биринчи раундда рақибидан устун келган Нурсултон Рўзибоевга бонус берилмади.
