Криштиану Роналдунинг Португалия миллий жамоасидаги фаолиятини якунлаши билан боғлиқ янги тафсилотлар маълум бўлмоқда. Португалия нашрлари терма жамоа бош мураббийи Жорже Жезуш 41 ёшли футболчи таркибга қайтиши учун ундан омма олдида узр сўрашга тайёр эканини ёзмоқда. Айни вақтда Роналдунинг ўзбошимчалик билан жамоа қароргоҳини тарк этгани учун унга нисбатан дисквалификация қўлланиши мумкин.
Мураббий Роналдунинг ортидан аэропортга борган
Роналду ва Жезуш ўртасидаги можаро 30 сентябрь куни авжига чиққан. Жезуш Данияга қарши ўйин олдидан ўтказилган матбуот анжуманидаги баёнотларидан сўнг футболчи нарсаларини йиғиштириб, миллий жамоа қароргоҳини тарк этган. Уни олиб кетиш учун аэропортга хусусий самолёт юборилган.
“Marca” нашри ёзишича, Жорже Жезуш ва Португалия футбол федерацияси раҳбари Педру Проэнса Роналдуни қароридан қайтариш учун унинг ортидан аэропортга борган. Бироқ бу уриниш самара бермаган. Футболчи уларни эшитишни истамаган ва Португалияни тарк этган.
Португалия футбол федерацияси регламентига кўра, миллий жамоа қароргоҳини ўзбошимчалик билан тарк этган футболчига бир ойдан олти ойгача дисквалификация ҳамда жарима қўлланиши мумкин.
Журналист Педро Сепулведанинг маълум қилишича, Португалия томони Роналду билан муносабатларни сақлаб қолиш учун яна бир бор уриниб кўрмоқчи. Унинг айтишича, Жезуш Данияга қарши ўйиндан кейин Роналдудан узр сўраб, уни миллий жамоадаги фаолиятини якунлаш ҳақидаги қарорини ўзгартиришга ундамоқчи.
Шу билан бирга, “O Jogo” нашри Роналду ўз қарорини қайта кўриб чиқмаслиги ҳақида ёзди. Қайд этилишича, футболчи ўзини “хиёнатга учрагандек” ҳис қилмоқда.
Нималар бўлди?
Мураббий ва футболчи ўртасидаги келишмовчилик Миллатлар лигаси гуруҳ босқичининг 2-турида Норвегияга қарши ўйинда бошланган. Жезуш мазкур учрашувда Роналдуни асосий таркибга киритмаган ва иккинчи бўлимда майдонга туширишини айтган. Бироқ амалда футболчи ўйин охиригача захирада қолган. Роналду эса буни келишувнинг бузилиши сифатида қабул қилган.
Данияга қарши ўйин олдидан ўтказилган матбуот анжуманида Жезуш футболчи билан ўртасида ҳеч қандай муаммо йўқлигини айтган. Шу билан бирга, у Роналду навбатдаги учрашувда ҳам захирада қолиши мумкинлигини билдирган.
“A Bola” нашрига кўра, айнан шу баёнотлардан сўнг Роналду Копенҳагендаги “Паркен” стадионини тарк этган. Бу вақтда Португалия миллий жамоаси футболчилари майдонда машғулот ўтказаётган бўлган.
“Вақти-соати келганда, мен ўзимни ҳар доим фидо қилган жамоани тарк этишимга сабаб бўлган барча ҳақиқатларни халқимизга айтиб бераман. Энди Португалия ва жамоадошларимга омад тилаш вақти келди”, — деган Роналду ижтимоий тармоқдаги саҳифасида.
Роналду билан яқин муносабатда бўлган журналист Пирс Морган ҳам вазиятга муносабат билдирган.
“Улар ўртасида низо йўқми? Фактчек қилдим: сафсата”, — деб ёзган у.
Қайд этиш жоиз, Роналду ва Жезуш ўтган мавсумда Саудия Арабистонининг “Ан-Наср” клубида бирга ишлаган ва жамоа мамлакат чемпионлигини қўлга киритган. Чемпионликдан сўнг Жезуш “Ан-Наср”ни тарк этиб, Португалия миллий жамоаси бош мураббийи этиб тайинланган.
