"Ҳайдовчилик гувоҳномаси" расмийлаштириб бераман деб, Қашқадарёлик аёлни 7.380.000 сўм миқдоридаги пулини олган фирибгар қўлга олинди. Бу ҳақда Киберхавфсизлик маркази хабар берди.
Қайд этилишича, Қашқадарё вилояти, Шахрисабз туманида яшовчи (аёл) Ж.С. ИИОга мурожаат қилиб, банк картасидан жами 7.380.000 сўм миқдоридаги пул маблағлари номаълум шахс томонидан фирибгарлик йўли билан ўзлаштирилганлигини маълум қилган.
Тезкор-қидирув хизмати Киберхавфсизлик бўлинмалари ходимлари томонидан ўтказилган тезкор-қидирув тадбирлари натижасида, мазкур жиноятни Қашқадарё вилояти, Шахрисабз шаҳрида яшовчи 29 ёшли Ж.Ф. содир этганлиги аниқланган.
Унга кўра, Ж.Ф., жабрланувчи (аёл) Ж.С. билан “Телеграм” мессенжери орқали ўзини "Фазлиддин" деб таништириб, унга ҳайдовчилик гувоҳномаси тайёрлаб беришини айтиб уни алдаб, олдиндан 7.380.000 сўм миқдоридаги пулларни ўзининг фойдаланувида бўлган банк картасига ўтказиб олиб, ёзишмаларни ўчириб юборган, ҳамда унинг қўнғироқларига жавоб бермай, қора рўйхатга киргазиб қўйган.
Мазкур ҳолат юзасидан Ўзбекистон Республикаси ЖКнинг 168-моддаси 3-қисми билан жиноят иши қўзғатилиб, Ж.Ф.нинг содир этилиб фош этилмай қолган бошқа шу турдаги жиноятларга алоқадорлигини текшириш юзасидан тезкор-суриштирув ишлари олиб борилмоқда.
Қонунга мувофиқ, Ўзбекистон Республикаси Жиноят кодексининг 168-моддаси 3-қисмиидаги жиноий хатти-ҳаракатлар учун 5 йилдан 8 йилгача озодликдан маҳрум қилиш жазоси назарда тутилган.
