Тошкентда "танишиб, кейин турмуш қуриш" мақсадидаги эркак 17 ёшли қизга нисбатан қўпол ва одобсиз ҳаракатлар содир этган. Қиз қаршилик кўрсатганида, унинг юзига урган. Суд уни 2,5 йилга озодликдан маҳрум қилди.
Жиноят ишлари бўйича Тошкент шаҳри Мирзо Улуғбек тумани суди нотаниш қизни урган шахсга нисбатан ҳукм чиқарди.
Жиноят иши материалларига кўра, 1 феврал куни Бўзбозор кўчасида 26 ёшли эркак "жамиятдаги хулқ-атвор қоидаларига, умумэътироф этилган ахлоқий меъёрларга қўпол тарзда бепарволик билан" муносабатда бўлиб, олдидан ўтиб кетаётган 17 ёшли қизга нисбатан қўпол ва одобсиз ҳаракатлар содир этган, қиз қаршилик кўрсатгач, унинг юзига уриб, воқеа жойидан қочиб кетган.
Суд-тиббий экспертизаси қизнинг пастки лаб соҳасида жароҳатлар аниқлаган ва уларни енгил жароҳатлар сифатида баҳолаган.
Айбланувчи ўз айбини тўлиқ тан олди ва турмушидан ажрашганидан сўнг «янги ҳаёт қуришга интилганини» айтди. Унинг сўзларига кўра, ўша куни у жабрланувчи қизни кўрган ва «биринчи у билан танишиб, кейин турмуш қуриш»ни хоҳлаган.
Йигитнинг таъкидлашича, у тасодифан қизга яқинлашиб, одобсиз ҳаракатлар содир этган. Қиз қаршилик кўрсатган пайтда ҳужум қилган шахснинг телефони ерга тушиб кетган, шундан сўнг айбланувчи унинг юзига мушти билан урган, қиз эса зарбадан ерга қулаган.
Жабрланувчининг сўзларига кўра, у воқеа содир бўлгандан бери жуда ёмон руҳий ҳолатда ва кўчада ёлғиз юришдан қўрқади. Унинг фикрича, жамиятда бундай шахсларнинг мавжудлиги барча қизларнинг ҳаёти ва соғлиғига хавф туғдириши мумкин. Жабрланувчи судланувчини кечирмади ва бу бошқаларга ўрнак бўлиши учун суддан энг оғир жазо тайинлашни сўради.
Суд эркакни Жиноят кодексининг 277-моддаси 2-қисми «д» банди (Безорилик, ўз мазмунига кўра умумэътироф этган ахлоқ қоидаларини намойишкорона менсимасликда ифодаланувчи ўтакетган беҳаёлик) бўйича айбдор деб топиб, 2 йил-у 6 ойга озодликдан маҳрум қилиш жазоси тайинлади.
