Зеленский Россиянинг тинчлик таклифига муносабат билдирди. Украина президенти Владимир Зеленский Россия билан можарони ҳал қилиш таклифини ультиматум деб атади. У Италиянинг Sky TG24 телеканалида Россия етакчиси Владимир Путиннинг Киев билан тинчлик музокараларини тиклаш ташаббуси ҳақидаги саволга шундай жавоб берди.
“Бу баёнотлар ультиматумдир. Уларда илгари мавжуд бўлган ултиматумлардан бошқа ҳеч нарса йўқ”, — деди Украина давлати раҳбари. - Энди унинг қилаётган ишлари нацизмнинг тикланиши эканини кўряпмиз. Бу нацизмнинг янги тўлқини, рус нацизми. У бизни босиб олинган ерларимиздан воз кечишимизни истайди, лекин босиб олинмаган ҳудудларимизни ҳам хоҳлайди. Мамлакатимиз ҳудудлари ҳақида гапиради ва тўхтаб қолиш ниятида эмас".
Аввалроқ Украина президенти девони раҳбари маслаҳатчиси Михаил Подоляк Х ижтимоий тармоғида Москва шартларини рад этган пост ёзган эди. Унинг сўзларига кўра, эълон қилинган ташаббусларда янги таклифлар йўқ.
Эслатиб ўтамиз, Путин яна бир бор “тинчлик музокараларига тайёрлиги”ни такрорлаган эди, аммо бунинг учун Украина ўз қўшинларини Кремль Россия ҳудуди деб ҳисоблаган руслар томонидан босиб олинган барча ҳудудлардан олиб чиқиши керак.
