Индонезиянинг Жанубий Калимантан ҳудудида ўрмон ёнғинларини ўчириш операциясида иштирок этаётган Super Puma H-225 русумли вертолёт дарёга қулади. Ҳодиса оқибатида Индонезиялик экипаж аъзоси ҳалок бўлди. Вертолётда бўлган Австралия ва Янги Зеландия фуқаролари эса омон қолди ва шифохонага олиб кетилди. Бу ҳақда BBC нашри хабар берди.
Мамлакатнинг офатларни бартараф этиш агентлиги ҳодиса юзасидан тергов бошланганини маълум қилди. Ижтимоий тармоқларда тарқалган видеоларда вертолётнинг сув олаётган вақтида дарёга қулагани, қутқарувчилар эса қайиқларда унга яқинлашганини кўриш мумкин.
AFP хабар беришича, вертолёт ёнғинларни ўчириш ишларига жалб қилиш учун шартнома асосида ёлланган компанияга тегишли бўлган.
Қайд этилишича, бир неча кун олдин Марказий Калимантан ҳудудида ҳам ёнғинларни ўчириш вақтида вертолёт ҳалокатга учраган. Ўшанда уч нафар экипаж аъзоси ҳалок бўлган.
Индонезияда бир неча ойдан бери давом этаётган ўрмон ёнғинлари Жануби-Шарқий Осиёнинг катта қисмини заҳарли тутун билан қоплаган. Қурғоқчилик ва Эль-Ниньо иқлим ҳодисаси ёнғинларнинг кучайишига сабаб бўлмоқда. Тутун қўшни Малайзия ва Сингапурга ҳам тарқалган. Ёғинлар ва ёнғинларга қарши курашишда Австралия ҳам самолётлар ва 20 нафар мутахассис билан ёрдам бермоқда.
