Исроил президенти Ицхак Герцог 27 октябрь куни бўлиб ўтган сайловлардан сўнг «Яшар» оппозицион партияси раиси Гади Айзенкотга янги ҳукуматни шакллантириш мандатини топширди. Бу ҳақда Kan телеканалига таяниб, РБК хабар берди.
Маълум қилинишича, Айзенкотга ҳукуматни шакллантириш учун 28 кун вақт берилган. Президент розилиги билан бу муддат яна икки ҳафтага узайтирилиши мумкин.
Парламент фракциялари билан ўтказилган маслаҳатлашувлар якунига кўра, Кнессетнинг 67 нафар депутати Гади Айзенкот номзодини қўллаб-қувватлаган. Яна 46 нафар депутат ҳукуматни шакллантиришни амалдаги бош вазир Биньямин Нетаньяхуга топширишни тавсия қилган. Етти нафар депутатдан иборат фракция эса бирор номзодни илгари сурмаган.
Гади Айзенкот мамлакатда «миллий фавқулодда ҳолат» ҳукуматини тузиш зарурлигини яна бир бор таъкидлаган. Унинг қайд этишича, бунинг учун ижодий ва одатдан ташқари сиёсий қадамлар талаб этилади.
Шунингдек, у барча парламент фракциялари билан ҳамкорлик қилишга тайёрлигини билдирган. Айзенкот бирлик сиёсий савдолашув мавзусига айланмаслиги кераклигини таъкидлаб, «Ликуд» ва «Диний сионизм» партиялари вакилларини ўзи раҳбарлигидаги ҳукуматни қўллаб-қувватлашга чақирган.
«Ҳукумат тузилишига тўсқинлик қилишга уринган киши мамлакат учун оғир дамларда Исроилни қутқара олмаган инсон сифатида тарихда қолади», — деган Айзенкот.
Агар Гади Айзенкот бошқа фракциялар билан келишувга эриша олса, шакллантирилган ҳукумат Кнессет ишончини қозониши керак бўлади. Музокаралар муваффақиятсиз якунланган тақдирда, у президентдан муддатни яна икки ҳафтага узайтиришни сўраши ёки уринишларини тўхтатиши мумкин.
Агар Айзенкот ҳукумат тузишда муваффақият қозона олмаса, мандат бошқа номзодга берилиши мумкин. Унга ҳам ҳукуматни шакллантириш учун узайтириш имкониятисиз 28 кун вақт ажратилади.
Эслатиб ўтамиз, Исроилда парламент сайловлари 27 октябрь куни бўлиб ўтган. Унда икки асосий сиёсий блокдан ҳеч бири парламентда кўпчиликни ташкил этиш учун зарур бўлган 61 та ўринни қўлга кирита олмаган. Нетаньяху блоки 53 та, Айзенкот блоки эса 48 та мандатга эга бўлган. Араб партиялари 19 та ўринни қўлга киритган. Сайловда сайловчиларнинг 77,7 фоизи иштирок этган.
