АҚШ президенти Дональд Трамп Россия билан уруш якунланганидан кейин Украина ҳозиргидан "бироз бошқача шаклга эга бўлиши"ни айтди. Бу ҳақда у CBS News телеканалидаги "60 Minutes" дастурига берган интервьюсида маълум қилди, деб ёзади DW.
Трамп суҳбат давомида Украинанинг АҚШ қуролларидан фойдаланишига ҳам тўхталди. Унинг таъкидлашича, аввалги президент Жо Байден Украинага 350 миллиард доллар нақд пул ва қурол-яроғ берган. Трамп эса ўз президентлиги даврида қуролларни Европага сотгани ва улар учун тўлиқ ҳақ олаётганини айтди.
"Биз бир қуролдан кейин бошқасини етказиб бердик. Айтганча, Украина улардан фойдаланиш учун жасорат кўрсатди. Чунки уларни ишлатиш учун жасорат керак ва Украина ўзини жиддий куч сифатида намоён қилди", — деди АҚШ президенти.
Украина урушдан кейин эркин ва мустақил давлат бўлиб қоладими, деган саволга Трамп ижобий жавоб берди. Шу билан бирга, у мамлакатнинг келажакдаги ҳудудий ёки сиёсий кўриниши ҳозиргидан фарқ қилиши мумкинлигини таъкидлади.
"Менимча, биз бунга эришамиз. Ва бу содир бўлади, охир-оқибат Украина бироз бошқача шаклга эга бўлади", — деди у.
Трамп тинчликка эришишдаги асосий тўсиқ сифатида Владимир Зеленский ва Владимир Путин ўртасидаги келишмовчилик ҳамда нафратни кўрсатди. Унинг фикрича, томонлар келишувга эришишга жуда яқин келган.
АҚШ президенти Путин ёки Зеленскийдан қайси бирига кўпроқ ишониши ҳақидаги саволга эса тўғридан-тўғри жавоб беришни истамади. "Мен бу ҳақда гапирмасликни маъқул кўраман. Аммо иккаласи билан ҳам тил топиша оламан", — деди у.
Трамп уруш тез орада якунланишига ишонишини билдириб, бунга эришишда ўзининг роли ҳал қилувчи бўлишини таъкидлади.
