Аввалроқ, ижтимоий тармоқларда Миробод тумани Нукус кўчасида жойлашган "Макро" супермаркети филиалидаги пишган гўшт растасида суварак юргани акс этган видео тарқалиб, кенг муҳокамаларга сабаб бўлган эди. Мазкур ҳолат юзасидан Миробод тумани ҳокимлиги Матбуот хизмати расмий муносабат билдирди.
Маълум қилинишича, Санэпидқўмита Тошкент шаҳар бошқармаси Миробод туман бўлими ходимлари томонидан жойига чиқиб ўрганиш ишлари ўтказилди.
Ўрганишлар давомида супермаркетда зарарсизлантириш ишларини ўтказиб туриш учун «Tashsanexpert» МЧЖ билан шартнома тузилгани ва сўнгги марта жорий йилнинг 30 июнь куни дезинсекция ишлари олиб борилгани аниқланди.
Шунингдек, дўконнинг пастки қаватида жойлашган хитой ресторанида озиқ-овқат маҳсулотлари тайёрланиши ва ундан дўконга сувараклар келиб қолиш эҳтимоли мавжудлиги сабабли, бир неча маротаба биргаликда зарарсизлантириш ишларини ўтказиш бўйича мурожаат қилинган. Бироқ ресторан маъмурияти томонидан доимий рад жавоби бериб келинган.
Ресторан раҳбарияти билан олиб борилган суҳбат натижасида овқатланиш корхонасида зарарсизлантириш ишларини олиб бориш учун ҳеч қандай шартнома мавжуд эмаслиги маълум бўлган.
"Супермаркет ҳамда ресторанда тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакилдан рухсат олиниб, кучайтирилган текширув ишлари амалга оширилишини маълум қиламиз",- дейилади хабарда.
