АҚШда доимий яшаш ҳуқуқини берувчи Green Card лотереясининг 2027 йилги мавсуми кечикмоқда. DV-2027 дастури учун аризалар қабули қачон бошланиши ҳозирча номаълум.
АҚШ Давлат департаменти аввалроқ лотереяда иштирок этиш жараёнига айрим ўзгартишлар киритилаётганини маълум қилган. Рўйхатдан ўтиш санаси ва танлов натижалари эълон қилинадиган вақт кейинроқ маълум қилиниши билдирилган.
АҚШнинг Ўзбекистондаги элчихонаси ҳам DV-2027 дастури учун рўйхатдан ўтиш ҳали бошланмаганини тасдиқлаган. Шунингдек, лотерея бошлангани ҳақидаги асоссиз хабарларга ишонмаслик ва ғолиблик имкониятини оширишни ваъда қилаётган шахслардан эҳтиёт бўлишга чақирган.
Ҳозирча аризаларни фақат АҚШ Давлат департаментининг расмий портали — dvprogram.state.gov орқали топшириш мумкин бўлади. Рўйхатдан ўтиш санаси эълон қилинмагунча аризалар қабул қилинмайди.
