Англиянинг Кент графлигида 24 ёшли эркак қиз дўстининг уч ойлик ўғлини йиғлашдан тўхтамагани учун калтаклаб, ўлимига сабаб бўлган. Суд уни қотиллик ва қасддан оғир тан жароҳати етказишда айбдор деб топди. Бу ҳақда "Daily Mail" хабар берди.
Суд материалларига кўра, воқеа 2022 йил 15 июль куни содир бўлган. Тайла Уормби қиз дўсти Шеннон Ҳоджес ухлаётган пайтда унинг 12 ҳафталик ўғлига қараб турган. Чақалоқнинг биологик отаси бўлмаган эркак бола билан уйда ёлғиз қолган.
Эрталаб соат 05:30 дан кўп ўтмай, боланинг онаси унинг аҳволидан хавотирланиб, тез ёрдам чақирган. Чақалоқнинг ранги оқариб кетган, ўзи эса ҳушсиз ҳолатда бўлган. Бошида ҳам сезиларли шиш пайдо бўлган.
Шифокорлар боланинг бош суяги сингани ва мияси кучли шишганини аниқлаган. Дастлаб у Маргейт шаҳридаги шифохонага, кейин эса Лондондаги тиббиёт муассасасига олиб борилган. Бироқ ўша куни тушдан кейин чақалоқнинг юраги тўхтаб, у вафот этган.
Тергов давомида Уормби воқеа тафсилотлари ҳақида полицияга ёлғон маълумот бергани аниқланган. У чақалоқни эрталаб соат 04:00 да уйғонганида бошида кичик шиш билан кўрганини, унга дори бериб, яна ётқизганини айтган.
Бироқ рақамли экспертиза ва тиббий далиллар эркак тез ёрдам чақирилишидан бироз олдин болага оғир жароҳат етказганини кўрсатган. Экспертлар чақалоқ бундан аввал ҳам қаттиқ силкитиш оқибатида жароҳатланган бўлиши мумкинлигини билдирган.
Судда бола вафотидан олдинги ҳафталарда ҳам бир неча бор шифохонага олиб борилгани маълум бўлган. У тез-тез қусган, танаси бўшашиб қолган ва одатдагидан кўпроқ йиғлаган. Шифокорлар бу белгилар чақалоқни силкитиш синдромига хос эканини айтган.
Шунингдек, чақалоқнинг биологик отаси унинг хавфсизлигидан хавотир билдирганидан кейин бола ижтимоий хизматлар назоратига олингани маълум бўлган.
29 октябрь куни суд ҳаъати Тайла Уормбини қотиллик ва қасддан оғир тан жароҳати етказишда айбдор деб топди. У ўз айбини тан олмаган. Эркакка нисбатан жазо тайинлаш масаласи кейинги суд мажлисида кўриб чиқилади.
