Тошкент вилояти ИИББ тезкор қидирув хизмати томонидан Тошкент тумани ИИБ ва ДХХ ҳудудий бўлинмаси билан ҳамкорликда ўтказилган тезкор тадбирда, 2002 йилда туғилган шахс (А.Т.) ўзининг Tracker автомашинасида вазни 1 кг 433 гр бўлган “мефедрон” синтетик гиёҳвандлик воситасини сотиш мақсадида сақлаб келаётганлиги аниқланиб, далилий ашё билан ушланди. Бу ҳақда вилоят ИИББ матбуот хизмати хабар қилди.
Аниқланишича, 22 ёшли шахс мазкур синтетик воситани бўлакларга бўлиб, контакциз манзил (“закладка”) орқали сотишни режалаштирган.
Ҳолат юзасидан Жиноят кодекси 273 моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек, уларни қонунга хилоф равишда ўтказиш) 5-қисми билан жиноят иши қўзғатилган. Тергов ҳаракатлари олиб борилмоқда.
