Самарқанд вилоятининг Пайариқ туманида бир гуруҳ шахслар томонидан шафқатсизларча калтакланиб, тириклайин кўмилган 32 ёшли эркак шифохонада 28 кун комада ётганидан сўнг вафот этди. Бу ҳақда «Миллар» дастурида маълум қилинди.
Маълум қилинишича, воқеа туманнинг Наврўз маҳалласида содир бўлган. Марҳум дўсти билан ошхонадан чиқиб, уйига қайтаётганида уларнинг йўлини оқ рангли «Спарк» автомобили тўсган. Машинадан тушган бир гуруҳ шахслар эркакка ташланиб, унинг бошига арматура билан зарба берган.
Унинг дўсти ҳужум қилганларни тўхтатишга ва уларнинг қўлидаги арматурани тортиб олишга уринган. Бироқ тажовузкорлар уни ҳам тош билан калтаклаган.
Марҳумнинг дўсти воқеани эслар экан, унинг қонга беланган ҳолда асфальтда ётганини, кейин эса ҳужум қилганлар уни машинага мажбурлаб тиқишга уринганини айтган.
Марҳумнинг акаси укасини маҳалла марказидан тахминан уч километр узоқликдаги, аҳоли яшамайдиган ҳудуддан оғир аҳволда топганини билдирган.
Унинг сўзларига кўра, укасининг атрофида бетон парчалари ва сим бўлган. Дастлаб уни вафот этган деб ўйлаган, бироқ ўпкасидан овоз эшитилгач, ҳали тирик эканини англаб, шифохонага олиб борган.
Аканинг таъкидлашича, ҳужум қилганлар укасини шунчаки калтаклаб кетмаган, балки овлоқ жойга олиб бориб, кўмишган. У ерда эркак ҳаво етишмаслиги сабаб ҳаракатлана бошлаганидан кейин ҳам унга нисбатан зўравонлик давом эттирилган.
Оғир тан жароҳатлари олган эркак шифохонада 28 кун давомида комада ётган. Бироқ шифокорлар унинг ҳаётини сақлаб қололмаган.
Ҳозирча жанжалга нима сабаб бўлгани маълум эмас. Мазкур ҳолат юзасидан жиноят иши қўзғатилган, гумонланувчилар ушланиб, уларга нисбатан қамоққа олиш тарзидаги эҳтиёт чораси қўлланган. Айни вақтда тергов ҳаракатлари давом этмоқда.
