Қалбаки акциз маркали алкоголь маҳсулотларини сотувга қўйган савдо дўконлари фош этилди. Бу ҳақда Бош прокуратура ҳузуридаги Департамент хабар қилди.
Департаментнинг Ургут туман бўлими томонидан ўтказилган терговга қадар текширувда “F.B.” хусусий корхонасига қарашли савдо дўконида кирим қилинмаган сифатини тасдиқловчи ҳужжатлари бўлмаган 29 турдаги жами 384 дона қалбаки акциз маркали алкоголь маҳсулотлари сотувга қўйилганлиги аниқланиб, ушбу маҳсулотлар ашёвий далил сифатида олинган.
Худди шундай, Департаментнинг Янгийўл шаҳри ва Шовот тумани бўлимлари томонидан ўтказилган тезкор тадбирларда “N.Sh.” МЧЖ ҳамда “Х.О.” хусусий корхонасига қарашли алкоголь маҳсулотлари савдо дўконларида турли номдаги жами 394 дона қалбаки акциз маркали алкоголь маҳсулотлари сотувга қўйилганлиги аниқланиб, ушбу маҳсулотлар ашёвий далил сифатида олинган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят ишлари қўзғатилиб, тергов ҳаракатлари ўтказилмоқда.
