Ижтимоий тармоқларда 34 ёш атрофидаги аёл божхона текширувини кутаётган вақтида вафот этгани ҳақида хабарлар тарқалди.
"UZBEKISTAN AIRPORTS" ва Бош прокуратура берган расмий маълумотларда, хабарлар мутлақо ҳақиқатга тўғри келмаслиги, аёл ўлмагани, у ҳозирда шифохонага ётқизилгани қайд этилган.
Расмийларга кўра, жорий йилнинг 7 октябр куни Тошкент вақти билан соат 17:34 да Тошкент халқаро аэропорти тиббиёт пунктига йўловчининг учиб келиш залида ўзини ёмон ҳис қилаётгани ҳақида хабар келиб тушган.
HY-334 Дубай – Тошкент рейси билан келган 1986 йилда туғилган Ўзбекистон фуқароси паспорт назоратидан ўтгач дарҳол ёрдам сўраган. Йўловчи бош оғриғи ва ўзини ёмон ҳис қилаётганидан шикоят қилган.
Йўловчи шикоятлари ва у билан бирга учиб келган шахсларнинг сўзларини инобатга олган ҳолда аэропорт тиббиёт пункти ходимлари биринчи тиббий ёрдам кўрсатиб, касалхонага ётқизиш учун шаҳар тез ёрдам хизматини чақиришган.
Соат 18:32 да тез ёрдам машинаси йўловчини Тошкент аэропортининг учиб келиш залидан Республика шошилинч тиббий ёрдам илмий марказига олиб кетган.
Аёлнинг оила аъзолари ижтимоий тармоқлар орқали чиқиш қилиб, юқоридаги гапларнинг аксини айтмоқда.
Унинг айтишича, аёл савдо-сотиқ мақсадида Дубайга борган. Аэропортда мазаси қочган ва оламдан ўтган.
Марҳуманинг қариндоши расмийлар шифохонада деб айтаётган аёлнинг жасади айни пайтда "морг"да эканлигини таъкидламоқда.
