2026 йил 25 октябрь куни Тошкент шаҳрининг Мирзо Улуғбек туманида ис газидан заҳарланиш оқибатида 6 нафар фуқаро вафот этди. Яна икки киши оғир аҳволда шифохонага ётқизилди. Бу ҳақда Бош прокуратура хабар берди.
Дастлабки маълумотларга кўра, фожиа қурилиш-таъмирлаш ишлари олиб борилаётган хусусий уйда содир бўлган. Аниқланишича, уйнинг ертўла қисмига ўрнатилган иситиш қозони хавфсизлик талабларига жавоб бермаган. Шунингдек, газ тармоғига белгиланган тартибда тегишли техник шартларсиз уланилган.
Мазкур ҳолат юзасидан Мирзо Улуғбек тумани прокуратураси томонидан Жиноят кодексининг 116, 257 ва 205-моддалари билан жиноят иши қўзғатилган.
Ҳозирда тергов ҳаракатлари Тошкент шаҳар прокуратураси томонидан олиб борилмоқда.
Бош прокуратура фуқароларни газ ускуналари ва иситиш мосламаларидан фойдаланишда хавфсизлик қоидаларига қатъий риоя қилишга чақирди.
Газ ускуналари малакали мутахассислар томонидан ўрнатилиши, уларнинг техник ҳолати мунтазам текширилиши лозим. Хавфсизлик талабларига бепарво муносабат оғир оқибатларга олиб келиши мумкин.
