19 октябрь куни соат тахминан 05:00 атрофида Тошкент вилояти Оҳангарон тумани ҳудудидан ўтган D 017 "Олмалиқ-Тошкент" автомобиль йўлининг 17-километрида ЙТҲ юз берган.
Маълум қилинишича, 1998 йилда туғилган ҳайдовчи Д.Ш. “Spark” русумли транспорт воситасини бошқариб кетаётган вақтида қатнов қисмида бўлган 22 бош қўйни уриб юборган.
Ҳайдовчи транспорт воситасини тўхтатиб, тушганидан сўнг, автомобиль салонида ёнғин келиб чиққан.
"Ҳодиса оқибатида ҳайдовчини соғлиғига зиён етмаган. Автоулов тўлиқ ёниб кетган ва 22 бош қўй нобуд бўлган", дейилади хабарда.
Ҳозирда ҳолат юзасидан Оҳангарон тумани ИИБ ЙҲХБ томонидан суриштирув ишлари олиб борилмоқда.
