Сал аввал ижтимоий тармоқларда Андижон вилоятида ниқоб тақиб олиб, давлат рақам белгиси бўлмаган автомашиналардаги шахслар йўл четида тўхтаб турган бошқа бир машинага тош отиб ҳужум қилганлиги акс этган видеолар тарқалган эди. Ҳолат юзасидан Андижон вилояти прокуратураси Матбуот хизмати хабар қилди.
Хабарга кўра, ушбу ҳолат жорий йилнинг 20 ноябрь куни фуқаро Ю.Д. ва бошқалар томонидан содир этилган.
Улар олдиндан жиноий тил бириктириб, бир гуруҳ бўлиб, фуқаро Л.А.ни бошқарувида бўлган Cobalt русумли автомашинасида пул маблағларини ташиш билан шуғулланишини билиб, унга ҳужум қилган.
Аниқланишича, улар Lacetti ва Cobalt автомашиналарни давлат рақам белгиларини ечиб олиб, орқасидан кузатиб келиб, юзларига ниқоб таққан ҳолда Андижон шаҳрининг "Ёйилма" маҳалласи А.Темур шох кўчасидан ўтган "Андижон-Асака" йўналишидаги транспорт қатнов йўлини "Андижон" йўналиши бўйича йўл четида тўхтаб турган Л.А.ни автомашинасига тош отиб, ҳужум қилган.
Бироқ ўша вақтда Л.А. автомашинасида ҳодиса жойидан қочганлиги сабабли жиноятни ўзларига боғлиқ бўлмаган ҳолда охирига етказа олмаган.
Мазкур ҳолат бўйича ЖКнинг 164-моддаси 2-қисми "б" банди билан жиноят иши қўзғатилиб, Ю.Д. процессуал тартибда ушланган.
Ҳозирда жиноят иши бўйича ИИО томонидан дастлабки тергов ҳаракатлари олиб борилмоқда.
