Тошкент халқаро аэропортида заргарлик буюмларини белгиланган тартибни бузган ҳолда Ўзбекистонга олиб киришга уриниш ҳолатлари фош этилди. Ушбу буюмларнинг дастлабки қиймати 1 млрд 20 млн 600 минг сўмга баҳоланган.
"Тошкент-АЭРО" ихтисослаштирилган божхона комплекси маълумотига кўра, сўнгги кунларда аэропортнинг чегара божхона пости ходимлари томонидан бир нечта қоидабузарлик аниқланган.
Хусусан, турли хорижий йўналишлардан учиб келган йўловчиларнинг юклари ва ёнидан божхона назоратига белгиланган тартибда тақдим этилмаган, умумий оғирлиги қарийб 691 грамм бўлган сариқ рангли металлдан ясалган заргарлик буюмлари топилган.
Дастлабки ҳисоб-китобларга кўра, мусодара қилинган буюмларнинг умумий қиймати 1 миллиард 20 миллион 600 минг сўмни ташкил этган.
Ҳозирда мазкур ҳолатлар юзасидан божхона текширувлари давом эттирилмоқда.
Эслатиб ўтамиз, аввалроқ Тошкентдан Олмаотага йўл олган йўловчидан 214 миллион сўмлик заргарлик буюмлари аниқлангани ҳақида хабар берилганди.
