Тошкент кўчаларида гўёки "Ободонлаштириш ходимлари" қиёфасида, автоулов эгаларидан пул сўраб тиланчилик қилаётган айрим аёллар аниқланди, дея хабар бермоқда Чилонзор тумани ҳокимлиги.
Ҳокимлик эълон қилган видеорепортажда ободонлаштириш ходимлари мурожаат билан чиқиб, чорраҳаларда айрим аёллар ўзларини ободонлаштириш ходими сифатида таништириб, чорраҳаларда автомобиль эгаларидан пул сўраётган аёллардан бу ишидан қайтишини сўрашди.
Ҳокимлик масъул ходимларидан бири кўчада ободонлаштириш ходимларининг кийимларини кийиб юрган сохта ходимларнинг олдига бориб, уларни сўроққа тутганида, улар Олмазор тумани ҳокимлиги Ободонлаштириш бўлими ходимлари эканини айтишди. Шу вақтда Ободонлаштириш бўлими раҳбарига қўнғироқ қилиниб, ҳақиқатда шундай ходимлар борлигини сўралганида, тизимда бундай ходимлар йўқлиги аниқланди.
Сохта ободонлаштириш ходимлари улар ҳақиқатда ходим эмаслигини тан олиб, пул топишга имкони йўқлиги, шу сабаб шундай йўл орқали пул топишга мажбур бўлганини айтишди.
Шундан сўнг, Ободонлаштиришнинг ҳақиқий аёл ходималари уларга мурожаат қилиб, бу йўлдан қайтишини илтимос қилишди.
"Улар (ободонлаштириш ходимларининг кийимларини кийиб юрган сохта ходимлар — таҳрир) биз билан бирга ишламайди. Жон опа-сингилларим ҳалол меҳнат қилайлик. Чорраҳада 4-5 нафар аёллар ободонлаштириш ходимларининг либосларини кийиб олиб, тиланчилик қиляпти. Биз ундай инсон эмасмиз, бизни ундай инсон деб ўйламанглар. Биз ҳалол меҳнат қиламиз. Бизнинг халатларимизни кийиб, бундай иснодлар келтирманглар", - дейди ободонлаштириш ходимаси.
