Тошкент шаҳридаги иккита мактабда эпидемиологик суриштирув ўтказилди, дея хабар қилди Санэпидқўмита Тошкент шаҳар бошқармаси Ахборот хизмати.
Маълум бўлишича, Санэпидқўмита Тошкент шаҳар бошқармаси Миробод туман бўлими мутахассислари томонидан туманда жойлашган 214- ҳамда 65-сонли умумий ўрта таълим мактабларида вирусли гепатит А касаллиги аниқланганлиги сабабли эпидемиологик суриштирув ҳамда санитария назорати ўтказилган.
Назорат давомида:
➖ўқувчилар ва ишчи ходимларнинг ўз вақтида тиббий кўрикдан ўтганлик хулосалари;
➖шахсий гигиена қоидаларига риоя қилиш тартиби;
➖мактаб биносида, синф хоналарда жорий тозалик ишларининг олиб борилиши, жиҳозларнинг созлиги;
➖иситиш тизимлари ёқилиб фойдаланишга топширилганлиги;
➖ҳожатхоналарда гигиена қоидаларига риоя қилинганлиги ҳамда қўл ювиш мосламалари ва оқава сув тизимининг соз ҳолатдалиги тўлиқ ўрганилиб, текширув ўтказилди.
Текширувлар натижасида, мактабнинг санитария ҳолати талабга жавоб бермаслиги маълум бўлганидан сўнг, аниқланган камчиликлар юзасидан мактаб раҳбариятига нисбатан маъмурий баённома расмийлаштирилди.
