Тошкент шаҳридаги автобусда аёлни ҳақоратлаган ва унинг юзига туфлаган эркакка нисбатан суд ҳукми ўқилди. Бу ҳақда судда иштирок этган darakchi.uz мухбири хабар бермоқда.
Маълум қилинишича, фуқаро Б.О. 11 ноябрь куни 46-сонли автобус ичида бўлган М.С.ни (аёл) автобуснинг ичи иссиқ бўлгани сабабли устидаги жемперини ечгани учун "бу ер сенга ечиниб кийинадиган жойми" деб уни жамоат жойида ҳақоратли сўзлар билан камситиб, юзига туфлаб, бақир-чақир қилиб, атрофдаги фуқароларнинг тинчлигини бузиб, майда безорилик содир қилган.
Суд мажлисида сўралган ҳуқуқбузар Б.О. ушбу ҳаракатига қисман иқрор бўлган. У рўпарасида ўтирган йўловчи аёл устидаги кийимларини ечиб ҳаммани ўзига қаратганини, шу сабабли унга танбеҳ берганини айтди. Айбланувчи ўша вақт тез гапиргани учун оғзидан сўлаги отилган бўлиши мумкинлигини таъкидлаб, аёлнинг юзига туфламаганини айтди. Эркак қилган ишидан пушаймонлигини, жабрланувчидан узр сўрашини, унга нисбатан енгиллик беришни сўраб кўрсатув берди.
Суд Б.О.ни Маъмурий жавобгарлик тўғрисидаги кодекснинг 183-моддасида назарда тутилган (Майда безорилик) ҳуқуқбузарликни содир қилган деб топилди ва унга шу моддага асосан 10 (ўн) сутка маъмурий қамоқ жазоси тайинлади. Шунингдек, Б.О. ҳисобидан Тошкент шаҳар ИИББ Махсус Қабулхона фойдасига 562 500 сўм ундириш белгиланди.
