Эрон электр таъминотида чекловларни жорий қилмоқда ва давлат муассасалари ҳамда корхоналар фаолиятини тўхтатмоқда.
Бунга сабаб — энергетика соҳасидаги инқироз бўлиб, у ноябр ойида Эроннинг заиф инфратузилмаси ва Исроил томонидан уюштирилган газ қувурларининг портлатилиши туфайли юзага келган.
Энергетика инқирози оқибатида жорий ҳафта давомида Эрон иқтисодиётида ишлаб чиқариш камида 30-50% га қисқарган, зарар эса ўнлаб миллиард долларни ташкил этиши мумкин.
Эрон ёқилғи субсидияларини қисқартиришни, жумладан, ойлик етказиб беришни 87 миллион литрдан 42,5 миллион литргача камайтириш ва нархларни оширишни режалаштирмоқда. Субсидияланган ёқилғи нархи ҳар бир литр учун 15 000 риялдан 20 000 риялга ошади, ярим субсидияланган ёқилғи нархлари эса 80 000 риялга етади. Режа, шунингдек, ҳар бир кишига 15 литр бензин бериш билан чекланишни ва транспорт воситаларига квота тартибини кучайтиришни кўзда тутади.
Эрон ҳукумати бу чора-тадбирларни мамлакатда яшаш харажатларининг кескин ошиши, миллий валютанинг қадрсизланиши ва энергия танқислиги фонида амалга оширмоқда. Шу билан бирга, ҳукуматнинг зиддиятли баёнотлари жамоатчилик хавотирини янада кучайтирмоқда.
