Гонконгда 2025 йил ноябрь ойида 160 дан ортиқ кишининг ҳаётига зомин бўлган йирик ёнғин сабаблари маълум бўлди. Мустақил комиссия фожиа ўчирилмаган сигарет туфайли бошланган бўлиши мумкинлигини билдирди. Бу ҳақда RTHK хабар берди.
Маълум қилинишича, ёнғин Wang Fuk Court турар жой мажмуасидаги бинолардан бирининг очиқ айвонида сақланган қоғоз материаллар ёниб кетиши оқибатида бошланган бўлиши мумкин.
Текширув давомида Hong Chong биносининг 104 ва 105-хонадонлари яқинидан иккита бутун ва битта чекилган сигарет қолдиғи топилган. Шунингдек, қурилиш ишчилари ёнғиндан бир неча ой олдин ушбу ҳудудда сигарет чеккани ҳақида далиллар аниқланган.
Комиссия сигарет ёнғинга бевосита сабаб бўлганини тасдиқловчи аниқ далиллар йўқлигини қайд этган. Бироқ мавжуд билвосита далиллар ушбу тахминни қўллаб-қувватламоқда. Текширувда ёнғинга мушак учқунлари, электр симларидаги носозлик, газ сизиб чиқиши ёки ўз-ўзидан ёниш сабаб бўлмагани айтилган.
Шунингдек, фожианинг бунчалик катта кўламда бўлишига қурилишдаги қоидабузарликлар ва сифатсиз материаллар ҳам сабаб бўлган. Хусусан, текширилган 20 та ҳимоя тўри намунасининг еттитаси ёнғинга чидамлилик талабларига жавоб бермаган.
Ҳисоботда ёнғиннинг тез тарқалиши, қуюқ тутун туфайли аҳолини эвакуация қилиш қийинлашгани ҳамда бинолар кириш қисмида ёнувчан чиқиндилар тўпланиб қолгани қурбонлар сони ортишига таъсир қилган омиллар сифатида кўрсатилган.
Эслатиб ўтамиз, ёнғин 2025 йил 26 ноябрь куни тахминан 4 800 нафар аҳоли истиқомат қилувчи Wang Fuk Court мажмуасида бошланган. Олов қисқа вақт ичида саккизта кўп қаватли бинодан еттитасини қамраб олган. Ёнғинни тўлиқ ўчириш ишлари 28 ноябрга қадар давом этган.
Фожиадан сўнг 12 нафар эркак ва бир нафар аёл эҳтиётсизлик оқибатида одам ўлимига сабаб бўлишда гумонланиб ҳибсга олинган. Улар орасида бош пудратчи, муҳандислик-консалтинг компанияси ва қурилиш ҳавозалари билан шуғулланувчи компания вакиллари ҳам бор.
