Туркия президенти Ражаб Таййиб Эрдўғон душанба куни Туркия ҳукумати Суриянинг бўлиниб кетишига йўл қўймаслиги ва агар бундай хавф пайдо бўлса, зудлик билан зарурий чораларни кўришга тайёр эканини билдирди.
“Биз Суриянинг яхлитлигига таҳдид соладиган ҳар қандай ҳаракатни қабул қила олмаймиз. Агар шундай хавфни кўрсак, зудлик билан зарур қадамларни ташлаймиз,” — деди Эрдўғон матбуот анжуманида.
Айни кунларда Туркия Сурия тепасига келган Ҳайъати Таҳрир аш-Шомни (HTS) қўллаб-қувватламоқда, бу эса Анқарага мамлакатнинг келажакдаги раҳбарларига таъсир ўтказиш имконини беради. Шу билан бирга, Туркия узоқ вақтдан бери Суриядаги курд қўшинларини Туркия хавфсизлиги учун таҳдид деб ҳисоблаб келади.
Курдлар назоратидаги ҳудудларда хавфсизликни Қуролли Сурия Демократик Кучлари таъминлайди, унинг таркибида Халқни ҳимоя қилиш кучлари (YPG) ҳам бор. Туркия YPGни террорчилик ташкилоти сифатида таснифлайди ва уни 1980 йиллардан бери Туркияда фаолият юритаётган Курдистон ишчилар партияси билан алоқдор деб ҳисоблайди.
“Террор ва зўравонликни танлаганларни кутаётган ягона тақдир — қуроллари билан бирга ерга кўмилиш бўлади. Мен буни очиқча айтаман: бунга ҳеч қандай куч тўсқинлик қила олмайди,” — деди Эрдўғон.
Туркия ташқи ишлар вазири Хакан Фидан душанба куни Суриядаги YPGнинг йўқ қилиниши “яқин кунларда” амалга оширилишини маълум қилди ва расмий Анқара ушбу террорчилик гуруҳининг мамлакатда фаолият юритишига йўл қўймаслигини таъкидлади.
Таъкидлаш керак, Сурияда курд террорчилари ягона хавотирли омил эмас. Башар Асад ҳокимиятдан четлатилгандан сўнг, Исроил Сурия ҳудудига юзлаб ҳаво ҳужумларини амалга оширди ва 1974 йилги “Тинчлик келишуви” натижасида яратилган демилитаризацияланган буфер ҳудудини босиб олди. Танқидчилар Исроилни мазкур келишувни бузишда ва чегара ҳудудларида назоратни кенгайтиришга уринишда айбламоқда.
Абдуллоҳ Саййид
