2021 йил июнь ойидан Гулистон шаҳар ҳокими ўринбосари – инвестиция ва ташқи савдо бўлими бошлиғи вазифасида ишлаб келган Қ.Д. хитойлик инвесторларнинг 350 минг доллардан ортиқ пулини фирибгарлик йўли билан қўлга киритгани маълум бўлди. Ижтимоий тармоқларда тарқалган хабарларга асосланиб darakchi.uz юборган сўровига нисбатан Олий суд жавоб берди.
Маълум қилинишича, инвесторларга таржимонлик қилган шахс жиноий шерик бўлган. Қ.Д фирибгарлиги ортидан 2024 йил июнь ойида лавозимидан озод этилган ва қамоққа олинган.
Қ.Д. 2021 йилнинг июнь ойидан 2024 йил июнь ойига қадар Гулистон шаҳар ҳокимининг ўринбосари-инвестиция ва ташқи савдо бўлими бошлиғи вазифасида ишлаб келиб, хизмат вазифаларига ҳудудий ривожлантириш дастурларини ишлаб чиқишни таъминлаш ва амалга оширилиши, янги ишлаб чиқариш объектлари қуриш ва ўз вақтида ишга тушириш ҳамда амалдагиларни модернизациялашнинг бориши устидан мониторинг олиб бориш, ҳудуд иқтисодиётини ривожлантиришнинг ўрта ва узоқ муддатли тасдиқланган дастурларига киритилган йирик инвестиция лойиҳаларини бажаришда кўмаклашиш, хорижий инвестицияларни жалб этиш соҳасидаги меъёрий-ҳуқуқий базани янада такомиллаштириш чоратадбирларини ишлаб чиқишда иштирок этиш ва амалга ошириш ҳамда ҳудудда
инвестицион фаолиятни кенгайтириш учун янада қулай шарт-шароитлар яратиш кирса-да, ноқонуний йўллар билан моддий бойлик орттиришни кўзлаб, ўзининг хизмат вазифалари ҳамда мавқеидан фойдаланган ҳолда фирибгарлик, яъни ишончни суиистеъмол қилиш йўли билан ўзганинг мулкини қўлга
киритиш мақсадида 2023 йил сентябрь ойида тадбиркорлик фаолиятини йўлга қўйиш ҳамда инвестиция киритишни кўзлаб, Сирдарё вилоятига келган Хитой Халқ Республикаси фуқаролари Qin Dongfeng ва бошқаларнинг ишончига кириб, улар ўртасида боғловчи вазифасини бажариб келган, таржимон А.А.А ўғли билан олдиндан жиноий тил бириктириб, бир гуруҳ бўлиб, у орқали ўзларининг жиноий режаларини амалга ошириш мақсадида олдиндан таниш бўлмаган Тошкент туманида яшовчи Ф.Ш.Х билан ноқонуний бойлик орттиришни кўзлаган.
Судланувчи Қ.Д. ўзининг хизмат вазифалари ҳамда мавқеидан фойдаланиб, бир гуруҳ шахслар билан олдиндан жиноий тил бириктириб, Qin Dongfengнинг 65 минг 550 АҚШ долларлик (802 млн. 637 минг сўм) жуда кўп миқдоридаги пул маблағларини фирибгарлик йўли билан қўлга киритиб, ўзининг юқоридаги жиноий ҳаракатлари билан Ўзбекистон Республикаси ЖКнинг 168-моддаси 4-қисми “а” бандида назарда тутилган жиноятни қасддан содир қилган.
